Úr Drekagaldri:
Stóra skepnan sem leyndist á bak við svörtu steinana rak gapandi ginið upp á móti Hildi og hvæsti á hana eins og reiður köttur.
Hún vék ósjálfrátt nokkur skref aftur á bak, en hélt samt vasaljósinu stöðugu og virti furðudýrið betur fyrir sér.
Það var nokkru stærra en fullvaxinn hestur, en allt öðruvísi í laginu. Hausinn minnti einna helst á úlfalda, fyrir utan hornin tvö sem stóðu upp úr enninu og veiðihárin í kringum víðan munninn. Hálsinn var langur eins og á gíraffa og álíka sver og stærstu eiturslöngur suðuramerísku regnskóganna. Ofarlega á kubbslegum bolnum mátti sjá fiðraða vængi eins og á fuglum.
Þetta var alveg örugglega dreki. Og hann var allur himinblár á litinn.
(s. 59)
