Sjöund er handsaumað ljóðaumslag með ljóðum eftir Gunnar Hersvein en hönnunin er eftir Sóleyju Stefánsdóttur. Sjöund sameinar mynd, ljóð og bréf í einu umslagi.
Úr Sjöund:
Undir yfirborðinu
Tíndi úr
huga mínum og hjarta
- lagði það varlega frá mér
tíndi úr
huga mínum og hjarta
- þar til allt varð tómt
nema eitthvað
undir yfirborðinu
Blés í jarðveginn
Grunar hvað það er
en þori ekki að snerta.
Ef þú átt einhverju sinni leið hjá
og finnur það í augum mínum
viltu vera svo góð
- hvað sem þér finnst um það
að segja mér ...
Um nótt
Þótt ég komi
skríðandi um nótt
í kafaldsbyl
og knýji dyra á húsi þínu
þótt ég guði á alla glugga
og kalli nafn þitt þúsund sinnum
haltu mér úti
haltu mér úti
hleyptu mér ekki inn
... ástin mín.