Tíu ára afmæli og afmælisgjöf til 1 árs barna í Bókmenntaborginni

Bergrún Íris Sævarsdóttir og Sleipnir

Í ár fagnar Reykjavík bókmenntaborg UNESCO 10 ára afmæli og af því tilefni verður áfanganum fagnað með því að gefa öllum eins árs börnum í Reykjavík bók að gjöf sem minnir á töfra lestursins. Bókinni verður dreift núna í apríl um leið og við föngum Alþjóðlegum degi bókarinnar 23. apríl. Í bókinni kynnast börnin Sleipni – lestrarfélaga barnanna í sögunni Vetrarævintýri Sleipnis eftir Gerði Kristnýju og Gunnar Karlsson. Bókin er skrifuð á íslensku en þýðingar á Vetrarævintýri Sleipnis eru aðgengilegar á ensku, pólsku og sænsku á vef bókmenntaborgarinnar (bokmenntaborgin.is).

Með bókinni fylgir fallegur bæklingur eftir Bergrúnu Írisi Sævarsdóttur rithöfund og myndhöfund sem leiðbeinir uppalendum um lestraráherslur fyrir börn á ólíkum aldri. Bæklingurinn hefst á þeim fallegu orðum „Fyldu barninu þínu inn í ævintýraheim bókanna. Lesið, hlæið, undrist, grátið, verið hugrökk saman og lifið ykkur inn í bók því lestur er töfrum líkastur“ og minnir á mikilvægi þess að byrja snemma að lesa með börnum.

Afmælisgjöfin fer í dreifingu í viku bókarinnar en á sama tíma fögnum við Barnamenningarhátíð í Reykjavík – en enginn þarf að örvænta þótt hún komi aðeins síðar, við erum svo heppin að mörg börn fagna 1 árs afmæli í borginni á þessu ári og því gefum við okkur apríl mánuð í verkefnið.

Frá upphafi hefur Bókmenntaborgin unnið að lestrarhvatningu með skólum borgarinnar fyrst í gegnum Lestrarhátíð í bókmenntaborg og nú síðustu árin með verkefninu Sleipnir – lestrarfélagi barnanna. Verkefni í nafni Sleipnis eru til fyrir leikskólastigið og yngsta stig grunnskólanna og þakkar Bókmenntaborgin gott samstarf við skólabókasöfn og Borgarbókasafn þeim árangri

Gjöfin er unnin í samstarfi við Borgarbókasafn Reykjavíkur og menningar- og ferðamálasvið Reykjavíkurborgar sem heldur utan um menningarskrifstofuna Reykjavík bókmenntaborg UNESCO.

 

Að fagna orðlistinni

Á afmælisárinu verður litríkri orðlist fagnað í borginni með margvíslegum hætti og verða haldnir stærri og smærri viðburðir sem minna á það lifandi og kvika orðlistarlíf sem í borginni býr. Í haust verður fagnað útgáfu afmælisrits þar sem reykvískir samtímahöfundar fjalla um ritlist og þýðingu hennar. Bókin er unnin í samstarfi við bókaútgáfuna Benedikt og er ritstjóri hennar Kjartan Már Ómarsson.
Alþjóðleg bókmenntahátíð í Reykjavík verður haldin í september og á sama tíma verða fulltrúar Bókmenntaborga UNESCO á ársfundi samtakanna í Reykjavík. En eins og síðasta ár hefur kennt okkur þá er erfitt að skipuleggja langt fram í tímann á þessum skrýtnu veirutímum. Við spörum stóru orðin en kynnum nánar dagskrá afmælisársins um leið og það er hægt.

Reykjavík hlaut þennan eftirsóknaverða titil Bókmenntaborg UNESCO á bókamessu í Frankfurt árið 2011, þá fimmta borgin í heiminum til að verða þess heiðurs aðnjótandi. Í dag starfar Reykjavík í neti 39 Bókmenntaborga og er samstarfsnetið ört vaxandi. Samstarf Bókmenntaborga UNESCO um allan heim hefur opnað ný tækifæri fyrir íslenska orðlist í alþjóðlegu samhengi og ný tækifæri fyrir rithöfunda hafa skapast með gjöfulu samstarfi og kynningu.