Tilnefningar til Íslensku bókmenntaverðlaunanna

Í dag, sunnudaginn 1. desember, var tilkynnt við hátíðlega athöfn á Kjarvalsstöðum hvaða fimmtán bækur eru tilnefndar til Íslensku bókmenntaverðlaunanna 2019. Tilnefnt er í þremur flokkum, flokki fræðibók og rita almenns efnis, flokki fagurbókmennta og flokki barna- og ungmennabókmennta.

Við verðlaunaafhendinguna flutti Heiðar Ingi Svansson, formaður Félags íslenskra bókaútgefenda ávarp, en félagið stendur að verðlaununum.  Formenn dómnefndanna þriggja tilkynntu síðan hvaða bækur eru tilnefndar. Þær eru sem hér segir:

Fræðibækur og rit almenns efnis:

Jón Viðar Jónsson: Stjörnur og stórveldi á leiksviðum Reykjavíkur 1925 - 1965. Útgefandi: Skrudda.

Ólína Kjerúlf Þorvarðardóttir: Lífgrös og leyndir dómar – Lækningar, töfrar og trú í sögulegu ljósi. Útgefandi: Vaka-Helgafell.

Páll Baldvin Baldvinsson: Síldarárin 1867-1969. Útgefandi: JPV útgáfa.

Sigríður Kristín Þorgrímsdóttir: Jakobína – saga skálds og konu. Útgefandi: Mál og menning.

Unnur Birna Karlsdóttir: Öræfahjörðin – Saga hreindýra á Íslandi. Útgefandi: Sögufélagið.

Dómnefnd skipuðu þau Árni Sigurðsson, Kolbrún Elfa Sigurðardóttir og Knútur Hafsteinsson sem jafnframt var formaður nefndar.

Barna- og ungmennabækur

Arndís Þórarinsdóttir: Nærbuxnanjósnararnir. Útgefandi: Mál og menning.

Bergrún Íris Sævarsdóttir: Langelstur að eilífu. Útgefandi: Bókabeitan.

Hildur Knútsdóttir: Nornin. Útgefandi: JPV útgáfa.

Lani Yamamoto: Egill spámaður. Útgefandi: Angústúra.

Margrét Tryggvadóttir: Kjarval – málarinn sem fór sínar eigin leiðir. Útgefandi: Iðunn.

Dómnefnd skipuðu þau Anna Þorbjörg Ingólfsdóttir, formaður nefndar, Jórunn Sigurðardóttir og Þórlindur Kjartansson.

Fagurbókmenntir

Bergþóra Snæbjörnsdóttir: Svínshöfuð. Útgefandi: Benedikt bókaútgáfa.

Bragi Ólafsson: Staða pundsins. Útgefandi: Bjartur.

Guðrún Eva Mínervudóttir: Aðferðir til að lifa af. Útgefandi: Bjartur.

Sölvi Björn Sigurðsson: Selta - Apókrýfa úr ævi landlæknis. Útgefandi: Sögur útgáfa.

Steinunn Sigurðardóttir: Dimmumót. Útgefandi: Mál og menning.

Dómnefnd skipuðu Bergsteinn Sigurðsson, formaður nefndar, Ragnhildur Richter og Steingrímur Þórðarson.

Verðlaunin veitt á nýju ári

Formenn dómnefndanna þriggja koma saman ásamt forsetaskipuðum formanni og velja einn verðlaunahafa úr hverjum flokki. Íslensku bókmenntaverðlaunin 2019 verða afhent um mánaðarmótin janúar-febrúar á komandi ári af forseta Íslands, Guðna Th. Jóhannessyni. Verðlaunaupphæðin er ein milljón króna fyrir hvert verðlaunaverk.

Verðlaunin voru fyrst veitt árið 1989. Þetta því í 31. sinn sem tilnefnt er til verðlaunanna. Sambærileg verðlaun eru veitt af útgefendafélögum í bæði Svíþjóð og Noregi. Sænsku verðlaunin eru jafn gömul þeim íslensku, voru stofnuð árið 1989, og bera nafnið Augustpriset en þau voru veitt síðastliðinn mánudag.  Norsku verðlaunin heita Brageprisen. Þau voru stofnuð árið 1992 og voru þau veitt þann 21. nóvember síðastliðinn.