Barnabókaverðlaun Guðrúnar Helgadóttur auglýst eftir handritum

Guðrún Helgadóttir borgarlistamaður Reykjavíkurborgar 2017 með Degi B. Eggertssyni.

Í apríl sl. samþykkti borgarráð að frá  og með vorinu 2019 verði Barnabókaverðlaun Guðrúnar Helgadóttur veitt árlega að vori. Guðrún Helgadóttir er einn vinsælasti og virtasti barnabókahöfundur landsins og um leið og hún er heiðruð með þessum hætti stuðla verðlaunin að nýsköpun í greininni og styðja við barnabókmenntir á Íslandi.

Reykjavíkurborg auglýsir hér með eftir óprentuðu handriti að skáldverki fyrir börn eða unglinga, frumsömdu á íslensku, til að keppa um Barnabókaverðlaun Guðrúnar Helgadóttur. Skilafrestur er til  og með 20. janúar 2019 og verður verðlaununum úthlutað í fyrsta sinn í apríl sama ár. Verðlaun að upphæð 1 milljón króna verða veitt fyrir eitt handrit. 
Útgáfuréttur verðlaunahandrits er í höndum höfundar eða þess forlags sem hann ákveður að starfa með. Þriggja manna dómnefnd metur verkin. Sé dómnefnd á einu máli um að ekkert innsent handrit fullnægi þeim kröfum sem hún telur að gera verði til verðlaunaverka má fella verðlaunaafhendinguna niður það árið.

Handritum skal skila undir dulnefni, en nafn og heimilisfang höfundar fylgi í lokuðu umslagi.

Handrit berist í síðasta lagi 20. janúar til skrifstofu Bókmenntaborgarinnar merkt: 

Bókmenntaverðlaun Guðrúnar Helgadóttur
b.t. Reykjavíkur Bókmenntaborgar UNESCO
Ráðhúsi Reykjavíkur, Tjarnargötu 11, 101 Reykjavík