Barnabókaverðlaun Guðrúnar Helgadóttur 2022

Barnabókaverðlaun Guðrúnar Helgadóttur verða ekki veitt í ár þar sem dómnefnd verðlaunanna taldi ekkert þeirra handrita sem barst í samkeppnina að þessu sinni uppfylla skilyrði sem gera verði til verðlaunahandrits. 

Fjölmörg handrit bárust og var þetta samdóma álit nefndarinnar eftir að hafa lesið og rýnt verkin, eins og kemur fram í umsögn hennar:

„Þótt sögurnar hafi verið fjölbreyttar og sumar nokkuð sérstakar, var það engu að síður einróma álit dómnefndar að ekki væri æskilegt að veita verðlaunin í ár. Ástæðan er einfaldlega sú að ekkert handritanna náði að uppfylla þær kröfur sem dómnefnd telur að gera verði til verðlaunaverka. Nokkur fjöldi þeirra var vandaður en þó hefði mátt vinna þau betur og kemur þar mögulega til styttri skilafrestur en undanfarin ár. Við hvetjum umsækjendur til að nýta tímann fram að næsta skilafresti, efla handrit sín og taka þátt að ári liðnu.“

Í dómnefnd voru þau Geir Finnsson (formaður), Heiða Rúnarsdóttir og Yrsa Sigurðardóttir.

Barnabókaverðlaun Guðrúnar Helgadóttur 2023

Skilafrestur handrita í samkeppni um Barnabókaverðlaun Guðrúnar Helgadóttur 2023 er mánudagur 17. október 2022. 

Senda skal inn til Reykjavíkurborgar óbirt handrit að skáldverki fyrir börn eða unglinga, frumsömdu á íslensku. Handritum sem keppa til verðlaunanna þarf að skila í þríriti merktum dulnefni, en nafn og heimilisfang fylgi með í lokuðu umslagi. 

Utanáskrift handrita:

Barnabókaverðlaun Guðrúnar Helgadóttur
b.t. Reykjavíkur bókmenntaborgar UNESCO
Ráðhúsi Reykjavíkur
Tjarnargötu 11
101 Reykjavík.

Útgáfuréttur verðlaunahandrits er í höndum höfundar eða þess forlags sem hann ákveður að starfa með. Sé dómnefnd á einu máli um að ekkert þeirra verka sem borist hafa fullnægi þeim kröfum sem hún telur að gera verði til verðlaunaverka, má fella verðlaunaafhendingu niður það ár.

Hver eru verðlaunin?

Verðlaunahafi hlýtur verðlaunafé. Verðlaunaféð er greitt af Reykjavíkurborg og eru ein verðlaun veitt árlega að vori samhliða verðlaunaafhendingu Barnabókaverðlauna Reykjavíkurborgar. Árið 2021 var upphæð verðlaunanna 1 milljón króna.

Hver skipar dómnefnd?

Dómnefnd til verðlaunanna er skipuð af menningar-, íþrótta- og tómstundaráði Reykjavíkurborgar til eins árs í senn. Hana skipa þrír einstaklingar, tilnefndir af menningar-, íþrótta-, og tómstundaráði, Reykjavík bókmenntaborg UNESCO og Rithöfundasambandi Íslands.

Verðlaunahafar frá upphafi:

2021: Margrét Tryggvadóttir: Sterk

2020: Arndís Þórarinsdóttir og Hulda Sigrún Bjarnadóttir: Blokkin á heimsenda

2019: Bergrún Íris Sævarsdóttir: Kennarinn sem hvarf