Lestrarhátíð

Merki Lestrarhátíðar

2012

Lestrarhátíð í Reykjavík var haldin í fyrsta sinn í október 2012 undir heitinu Orðið er frjálst, sem einnig eru einkennisorð Bókmenntaborgarinnar Reykjavíkur. Hátíðin var haldin árlega til 2017 en var þá lögð af.

Reykjavík bókmenntaborg UNESCO hélt utan um hátíðina en fjölmargir aðrir komu einnig að henni, til að mynda skólar á öllum stigum, útgefendur, rithöfundar, bókasöfn og margir fleiri. Þessi fyrsta Lestrarhátíð í Reykjavík var helguð skáldsögunni Vögguvísa eftir Elías Mar frá 1950, en hún er ein fyrsta Reykjavíkursagan sem lýsir lífi ungs fólks í hinni nýju borg.

Fyrsti bókmenntaskjöldurinn sem Bókmenntaborgin setti upp til að minnast bókmenntasögu Reykjavíkur var afhjúpaður af þessu tilefni, í Aðalstræti 6-8 þar sem barinn Adlon stóð á sögutíma Vögguvísu, en hann kemur við sögu í bókinni.

Bókmenntaborgin hefur síðan sett upp margar slíkar bókmenntamerkingar í borgarlandinu sem lið í að kortleggja bókmenntasögu hennar og gera hana sýnilega.

Lestrarhátíð í Bókmenntaborg.