Æviágrip
Sverrir Norland fæddist árið 1986 í Reykjavík. Hann útskrifaðist af eðlisfræðibraut Menntaskólans í Reykjavík og er með BA-próf í lögfræði og ritlist frá Háskóla Íslands, auk mastersgráðu í skapandi skrifum frá Middlesex University í London. Hann bjó um árabil erlendis, fyrst í London og síðar í París og New York, en býr nú í Reykjavík.
Sverrir gaf út sína fyrstu ljóðabók, Suss! Andagyðjan sefur! árið 2006 og hefur síðan sent frá sér fjölda bóka, þar á meðal skáldsögurnar Kvíðasnillingarnir (2014) og Fyrir allra augum (2016). Stríð og kliður (2021) vakti athygli fyrir persónulega nálgun á tækni, sköpun og loftslagsvána. Sverrir rekur útgáfuna AM forlag ásamt konu sinni, Cerise Fontaine, og hefur þýtt og gefið út barnabækur eftir höfunda á borð við Maurice Sendak, Pénélope Bagieu, Tomi Ungerer og Junko Nakamura. Árið 2019 hlaut Sverrir viðurkenningu þriggja bókmenntahátíða (Cuirt, Vilenica, Festival of World Literature), sem efnilegur og upprennandi höfundur af jaðarmálsvæðum Evrópu („Emerging Writer on Tour“).
Auk eigin ritstarfa hefur Sverrir sinnt margbreytilegum störfum á sviði fjölmiðla, bókmennta og lista. Frá hausti 2019 hefur Sverrir verið reglulegur gagnrýnandi í Kiljunni og haustið 2021 hélt hann úti úti „Bókahúsinu“, hlaðvarpi um bækur á vegum Forlagsins. Sverrir hefur setið í dómnefnd ljóðaverðlaunanna Maístjörnunnar og sinnt formennsku dómnefndar Íslensku hljóðbókaverðlaunanna. Sverrir situr í stjórn IBBY á Íslandi, er í félagsráði Máls og menningar og á sæti varamanns í stjórn Almannaróms, miðstöðvar um máltækni.
Síðast en ekki síst er rétt að taka fram að Sverrir var valinn „bjartasta von Hlíðaskóla“ árið 2001.
Frá höfundi
Að vera eða vera ekki rithöfundur
Fólk spyr mig stundum: „Sverrir – langaði þig alltaf að verða rithöfundur?“
Því er auðsvarað:
NEI!!
#
Grín. Auðvitað dreymdi mig alltaf um að verða rithöfundur.
Ég var veikburða barn, hlédrægur og pasturslítill drengur sem fór með veggjum. Því var skiljanlegt að mér væri huggun í því að sökkva mér í bóklestur og kynnast þar aragrúa persóna (því að líf mitt utan bókarspjaldanna var svo einmanalegt).
Þegar ég eltist tók ég svo sjálfur að skapa mér skjól á síðum stílabóka þar sem ég bjó til sögur. Ég hugsaði: Ef ég gæti einn daginn unnið fyrir mér með þessum hætti, með því að skrifa, yrði það fullkomið!
Já, mig dreymdi alltaf um að verða rithöfundur ...
#
Að vísu er það ekki alveg satt.
Þegar ég var lítill flökraði þeirri tilhugsun raunar aldrei að mér.
Ég las sárafáar bækur, það voru helst Andrésblöð og teiknimyndasögur. Og að vísu Skytturnar þrjár eftir Alexandre Dumas. En miklu frekar horfði ég á sjónvarpið, á endalaust flóð af hasarmyndum og spennuþáttum.
Og ég spilaði tölvuleiki þangað til mig verkjaði í fingurna.
Mest var ég þó úti, á hreyfingu.
Ég var hraustur drengur, góður í íþróttum, hljóp allra barna hraðast, var þindarlaus og eirðarlaus. Ég renndi mér vítt og breitt um Reykjavík á línuskautum, spilaði körfubolta, var metnaðarfullur knattspyrnustrákur og gegndi sem slíkur fyrirliðastöðu í A-liði Vals sem vann hvern titilinn á eftir öðrum.
Þegar ég verð stór, hugsaði ég, ætla ég að verða atvinnumaður í fótbolta!
En að sitja heima við skrifborð og raða orðum á blað eins og einhver getulaus liðleskja?
Hah, þvílík martröð!
#
Í dag er ég starfandi rithöfundur.
Draumurinn hefur ræst – martröðin.
Ég mundi allavega gera hvað sem er til að breyta lífi mínu og losna undan þessu fargi: því að skrifa og vera þar með alltaf utan við mig ...
Ég þoli þetta ekki.
Og ég elska þetta.
Að vera rithöfundur er það besta sem hefur hent mig. Ég get ekki hugsað mér að lifa öðruvísi og ég gæfi fúslega aleiguna til að lifa öðruvísi.
#
Þegar ég var lítill lét mig dreyma um að verða og verða ekki rithöfundur.
Á þeim miklu óvissutímum voru reglulega lagðar fyrir mig svohljóðandi spurningar sem ollu mér botnlausri skelfingu:
Hver er uppáhaldsliturinn þinn?
Hver er uppáhaldsmaturinn þinn?
Það var engin flóttaleið í boði. Fyrr eða síðar birtist alltaf freknótt stelpa með djúpblá augu og snoðrakaður strákur með kartöflunef og kröfðust þess að fá skýr svör.
„Og þú mátt bara velja þér eitt uppáhalds!“
En vandinn var sá að ég hafði aldrei nein skýr svör við þessum afdráttarlausu spurningum.
Ég sagði bara eitthvað:
„Uppáhaldsliturinn minn er okkurgulur.“
„Eftirlætismáltíðin mín er hægeldaður fasani.“
„Uppáhaldsliturinn er að sjálfsögðu purpurarautt sólarlag.“
Það var ekki eins og ég væri litblindur eða hefði enga ánægju af mat. Þvert á móti. En mér fannst tilhugsunin um að læsa mig inn í einhverja fasta útgáfu af sjálfum mér svo hlægileg.
„Ég er þvagfæraskurðlæknir, uppáhaldsliturinn minn er grár og ekkert veit ég gómsætara en schnitzel.“
Í huga mér gengu svona fullyrðingar ekki upp. Mér hefur aldrei fundist ég hafa neinn heilsteyptan persónuleika, hvað þá fastmótaða sýn á lífið eða skýrt mótaðan smekk á mat, litum, bókmenntum, siðferði, íþróttum, dansi ...
Get þess vegna ekki haldið með einum lit. Valið eftirlætismáltíð.
Veröldin er falleg vegna þess að hún er litrík og bragðmikil.
Fjölbreytt og flókin.
#
Já, mig dreymdi alltaf um að verða rithöfundur
Rétt eins og mig dreymdi alltaf um að verða kennari, fjárfestir, sjómaður, forritari, jarðfræðingur ...
... maríutása, skósóli, lagstúfur, ástarfundur, seðlaveski ...
Með því að vera rithöfundur get ég verið þetta allt og um leið losnað við þá áþján að vera eitthvað.
En kannski hætti ég þessari vitleysu bara á morgun og dríf mig á sjóinn.
(1. júlí 2022)
Greinar
Um einstök verk
Með mínum grænu augum
Ásta Gísladóttir: „Heimsókn í ljóðaheima“ (ritdómur)
Spássían 2010 (haust), bls. 20.
Verðlaun
Verðlaun og viðurkenningar
2021 - Bókmenntaverðlaun starfsfólks bókaverslana: Kva es þak? (besta þýdda barnabókin)
2019 - Emerging Writer on Tour. Viðurkenning og styrkur fyrir efnilega höfunda af jaðarmálsvæðum í Evrópu.
2004 - Ljóðaverðlaun MS. Fyrstu verðlaun.
2004 - Leikritasamkeppni framhaldsskólanna. Fyrstu verðlaun
Tilnefningar
2020 - Bókmenntaverðlaun starfsfólks bókaverslana: Þar sem óhemjurnar eru (besta þýdda barnabókin)
Kletturinn
Lesa meiraKletturinn er skáldsaga um fyrirgefningu, metnað, siðferðileg álitamál og ekki síst tilfinningasambönd karlmanna.Stríð og kliður : hvað verður um ímyndunaraflið?
Lesa meiraManneskjusafnið (skáldsaga í hæfilegri lengd)
Lesa meiraErfðaskrá á útdauðu tungumáli (ljóð)
Lesa meiraHeimafólk (sögur)
Lesa meiraFallegasta kynslóðin er alltaf sú sem kemur næst (skáldsaga í hæfilegri lengd)
Lesa meiraHið agalausa tívolí (skáldsaga í hæfilegri lengd)
Lesa meiraFyrir allra augum (skáldsaga)
Lesa meiraKvíðasnillingarnir
Lesa meira
Heimili
Lesa meiraStysti dagurinn
Lesa meiraEldhugar: konurnar sem gerðu aðeins það sem þær vildu
Lesa meiraKva es þak?
Lesa meiraÍ morgunsárið
Lesa meiraÞar sem óhemjurnar eru
Lesa meiraRæningjarnir þrír
Lesa meiraTröllið hennar Sigríðar
Lesa meira