Beint í efni

Helgi Ingólfsson

Æviágrip

Helgi Ingólfsson er fæddur 18. júlí 1957 í Reykjavík. Hann lauk stúdentsprófi frá Menntaskólanum við Tjörnina 1977, prófi í uppeldis- og kennslufræði 1988 og B.A.-prófi í sagnfræði og bókmenntafræði frá Háskóla Íslands árið 1994. Hann hefur kennt sögu, einkum fornaldarsögu og listasögu, við Menntaskólann í Reykjavík frá 1984. Þá veitti hann sérfræðiaðstoð í sagnfræði við Íslensku alfræðiorðabókina 1988-1990.

Fyrsta bók Helga, Letrað í vindinn: samsærið, kom út árið 1994. Sögusviðið er Rómarborg á tímum keisaraveldisins. Fyrir söguna hlaut Helgi Bókmenntaverðlaun Tómasar Guðmundssonar sama ár. Ári síðar kom út sjálfstætt framhald fyrri bókarinnar; Letrað í vindinn: þúsund kossar. Þar með sagði Helgi skilið við Rómarveldi sem sögusvið og færði sig yfir í gamansamar og farsakenndar frásagnir úr íslenskum samtíma. Hann hefur nú sent frá sér nokkrar slíkar sagnir, m.a. Lúin bein, sem kom út sumarið 2002. Helgi hefur einnig sent frá sér glæpasögur, bæði smásögur og skáldsögur og hlaut hann Blóðdropann, hin íslensku glæpasagnaverðlaun fyrir bókina Þegar kóngur kom árið 2010. Eftir Helga liggja einnig smásögur og ljóð og greinar í fagtímaritum. Hann hefur að auki fengist við gerð námsefnis.