Charlotte Roche

En bókin fjallar bara um einmanaleika, sagði frænka mín þegar ég hringdi í hana. Ég var nokkuð áhyggjufull, því ég hafði nýlega sent henni skáldsöguna Votlendi, eftir þýsku skáldkonuna Charlotte Roche, en hafði láðst að athuga um hvað bleika bókin með avókadómyndinni á kápunni fjallaði. Frænka mín er rúmlega áttræð. Henni fannst þetta nú ekki mikið mál og var mest hissa á því hvað fólk gæti verið að hnussa og hneykslast á þessu. Stúlkan þráir bara væntumþykju og ást og gerir því það sem hún gerir til að einhver láti sér annt um hana, sagði hún, af hverju getur fólk ekki skilið að það er bara þetta sem sagan fjallar um?