Boris Akúnin

Ég verð að játa það strax að ég hef verið mikill aðdáandi bóka Akúnins frá upphafi og átt margar góðar stundir með ríkisráðinu Fandorin og var því ekki lítið spennt þegar ég á sínum tíma fékk upp í hendurnar enska þýðingu á Leviatan. Í stuttu máli sagt olli Rússinn mér ekki vonbrigðum: Leviatan er að mínu mati besta og skemmtilegasta ríkisráðsbókin til þessa. Bókin kom svo út íslenskri þýðingu Árna Bergmanns nú fyrir jólin.

Árni Bergmann hefur nú í áratugi fært Íslendingum frábærar þýðingar sínar á rússneskum skáldskap, allt frá þekktum heimsbókmenntum til minna þekktra og yngri höfunda. Nú síðast hefur hann tekið að sér að bjóða uppá bækur vinsæls glæpasagnahöfundar, Boris Akúnin, en sá mun hafa slegið hraustlega í gegn í heimalandi sínu og sækir nú fast inn á aðra markaði. Þriðja bókin kom út nú nýlega, Vetrardrottningin, en áður hafa Ríkisráðið og Krýningarhátíðin glatt hjörtu glæpasagnaunnenda – og fleiri, en ágæti þessara bóka kemur meðal annar fram í því að þær ættu að höfða jafnt til unnenda sögulegra skáldsagna sem og heimsbókmennta.