Um þættina
Fangar er íslensk sjónvarpsþáttaröð í 6 þáttum í leikstjórn Ragnars Bragasonar. Þáttaröðin byggir á hugmynd Unnar Aspar Stefánsdóttur og Nínu Dögg Filippusdóttur en handritið var skrifað af Margréti Örnólfsdóttur og Ragnari Bragasyni. Fyrsti þáttur var frumsýndur þann 1. janúar 2017 á RÚV.
Fangar er fjölskyldusaga úr íslenskum samtíma. Líf Lindu og fjölskyldu hennar umturnast þegar hún er færð í kvennafangelsið í Kópavogi eftir að hafa ráðist á föður sinn, þekktan mann úr viðskiptalífinu og veitt honum lífshættulega áverka. Á sama tíma og Herdís móðir Lindu berst í fullkominni afneitun við að halda ímynd fjölskyldunnar flekklausri fer þingmaðurinn Valgerður, eldri systirin, að nýta fjölskylduharmleikinn sér til framdráttar. Í fangelsinu hittir Linda fyrir aðrar konur sem hafa farið út af sporinu og myndar sambönd sem hafa örlagarík áhrif á líf hennar.
