Lestrarhátíð

Merki Lestrarhátíðar

Eitt af stærri verkefnum Reykjavíkur Bókmenntaborgar UNESCO er að standa fyrir árlegri lestrarhátíð í Reykjavík í samvinnu við stofnanir, félagasamtök og aðra sem starfa á bókmenntasviðinu. Slík hátíð var haldin í fyrsta sinn í október 2012. Lestrarhátíð er fyrir fólk á öllum aldri. Markmið Lestrarhátíðar er að hvetja til lesturs, auka umræðu um bókmenntir og tungumál og síðast en ekki síst að vekja athygli á gildi orðlistar í menningaruppeldi og daglegu lífi.

Hátíðin er hugsuð sem grasrótarhátíð þar sem allir þeir sem vilja bjóða upp á viðburði og dagskrá sem tengist þemanu hverju sinni geta tekið þátt.

Hátíðin stendur allan mánuðinn og októbermánuður er því mánuður orðlistar í Reykjavík. Lestrarhátíð hlaut viðurkenningu Jónasar Hallgrímssonar á degi íslenskrar tungu 2014.

 

 

Benedikt Gröndal

Bensi og aðrir fuglar

Í ár verður Lestrarhátíð ekki haldin með hefðbundnu sniði heldur verður nýopnað Gröndalshús í Grjótaþorpi í brennidepli. Frítt  verður inn í húsið allan október mánuð.

Þann 17. júní sl. opnaði Gröndalshús í glæsilegri endurgerð Minjaverndar, þar er sýning um skáldið Benedikt Gröndal, ævi hans og störf. 
Benedikt Gröndal var stórhugi á sínum tíma og má nefna hann glæsilegan fulltrúa nítjándu aldarinnar sem og húsið sem við hann er kennt. Hann var skáld, náttúrufræðingur, myndlistarmaður og kennari. Hann var einnig áhugamaður um mótun bæjarins og þróun Reykjavíkur sem höfuðstaðar Íslands. Auk ljóða og prósatexta liggja eftir hann greinar um lífið í bænum þar sem hann leggur til umbætur á höfuðstaðnum í anda þess sem tíðkast í erlendum stórborgum.

Minning Gröndals dofnaði um miðbik síðustu aldar en mikilvægi hans í íslenskri bókmennta- og menningarsögu hefur verið staðfest síðastliðin ár með útgáfu á verki hans Íslenskir fuglar og endurútgáfu á sjálfsævisögu hans, Dægradvöl, sem er ein rómaðasta sjálfsævisaga íslenskra bókmennta. Gröndal er einnig lifandi í skáldverkum samtímaskálda og má þar nefna skáldsögurnar Sæmd eftir Guðmund Andra Thorsson og Öræfi Ófeigs Sigurðssonar.

Dagskrá verður í Gröndalshúsi þar sem farið verður yfir sögu hússins og skáldsins. Landsbókasafn Íslands mun opna sýningu  6. október þar sem brot af handritum Benedikts verða til sýnis. Bókakaffi Gerðubergs í október verður helgað Benedikt Gröndal. 

Skólahópar geta bókað heimsókn í húsið utan hefðbundins opnunartíma í gegnum netfangið bokmenntaborgin@reykjavik.is.