Bókamessa í Bókmenntaborg

Bókamessa í Bókmenntaborg, er árlegur viðburður í nóvember. Þar leiða saman krafta sína Bókmenntaborgin  og Félag íslenskra bókaútgefenda. Allar bækur útgefnar á árinu eru gjaldgengar á Bókamessu og má segja að á henni sjáist vel hið svokallaða jólabókaflóð.

Fyrsta Bókamessa í Bókmenntaborg var haldin árið 2011 og þá í Ráðhúsinu og Iðnó. Síðan þá hefur Bókamessa vaxið ár frá ári og er nú einn af stóru viðburðunum í Bókmenntalífi borgarinnar. Bókamessa flutti í Hörpu árið 2016 og leggur þar undir sig Flóa og salina Ríma A og B.

Á Bókamessu koma saman bókaútgefendur, höfundar og lesendur og eiga saman helgi þar sem orðlistin er í öndvegi. Fjölbreytt og skemmtileg bókmenntadagskrá er í tengslum við Bókamessu og lesendur geta nælt sér í glóðvolgar bækur á góðu verði beint frá útgefenda. 

Bókamessa 2017 verður haldin helgina 18. - 19. nóvember. 

DAGSKRÁ Bókamessu í Hörpu Árið 2017

LAUGARDAGUR 18. NÓVEMBER

 

RÍMA A

13:00 – 14:00
Bækur og náttúran
Náttúran tekur á sig ýmsar myndir og er hún birt á ólíkan hátt í eftirfarandi bókum.

  • Gísli Pálsson fjallar um bók sína Fjallið sem yppti öxlum.
  • Unnur Jökulsdóttir fjallar um bók sína Undur Mývatns.
  • Einar Falur Ingólfsson ljósmyndari sýnir ljósmyndir og fjallar um ljósmyndabók sína Landsýn.

14:00 - 15:00
Minn tími

Páll Valsson ræðir við Jóhönnu Sigurðardóttur fyrrverandi forsætisráðherra um bók þeirra Minn tími, sem fjallar um líf og störf Jóhönnu.

15:00 - 15:30
Anna – eins og ég er

Guðríður Haraldsdóttir blaðamaður spjallar um bók sína Anna - eins og ég er. Bókin fjallar um Önnu Kristjánsdóttur.

15:30 - 16:00
Helgi Tómasson
Ingibjörg Björnsdóttir, ballettdansari og fyrrverandi skólastóri Listdansskóla Íslands, ræðir um list Helga Tómassonar og mikilvægi hans í íslenskri listdanssögu.

16:00 -16:30
Hvar á ég heima?
Kristín Helga Gunnarsdóttir rithöfundur og Katrín Harðardóttir þýðandi spjalla um bækurnar Vertu ósýnilegur - Flóttasaga Ishmaels og Ég er Malala sem báðar fjalla um ungt fólk sem hrakið er að heiman og út í óvissuna. Dögg Hjaltalín leiðir spjallið.
 

RÍMA B

13:00 – 14:00
Sögur af konum

  • Tvennir tímar. Soffía Auður Birgisdóttir ræðir um endurminningar Hólmfríðar Hjaltason sem Elínborg Lárusdóttir skráði og eru nú endurútgefnar.
  • Rúna - Örlagasaga. Sigmundur Ernir Rúnarsson fjallar um hestakonuna Rúnu Einarsdóttur og litskrúðuga ævi hennar. 
  • Það sem dvelur í þögninni. Ásta Kristrún Ragnarsdóttir kynnir bók sem hún hefur skrifað um sögu formæðra sinna. Í lokin flytur Valgeir Guðjónsson lag samið í anda bókarinnar. 

14:00 – 15:00
Upplestur úr nýjum bókum

  • Bjarni Harðarson: Í skugga drottins
  • Yrsa Þöll Gylfadóttir: Móðurlífið, blönduð tækni
  • Guðmundur Brynjólfsson: Tímagarðurinn

15:00 – 16:00
Höfundaspjall

Haukur Ingvarsson, útvarpsmaður og rithöfundur, ræðir við höfundana Halldór Armand (Aftur og aftur) og Jónas Reyni Gunnarsson (Millilending) um nýútkomnar bækur þeirra.

16:30 – 17:00
Ég er drusla: samspil göngu og bókar
Auður Jónsdóttir, Kristín Dóra Ólafsdóttir, Gullbrá Þórarinsdóttir, Helga Lind Mar og Hjalti Vigfússon frá Druslugöngunni ræða um gönguna, hlutverk hennar og tengingu göngu og bókar.

 

Krakkahorn Sleipnis í Flóa

13:00 – 13:30
Skrímslasmiðja fyrir uppátækjasama krakka

Áslaug Jónsdóttir, einn af höfundum Skrímslabókanna sívinsælu, býður krökkum að föndra með sér jólaskrímsli.

14:00 – 14:30
Fjölskyldumyndasmiðja

Fjölskyldur eru allskonar og þær Ásta Rún Valgerðardóttir og Lára Garðarsdóttir, höfundar bókarinnar Fjölskyldan mín, leiða okkur í allan sannleika um ólíkar fjölskyldugerðir.

14:30
Ratleikur með Lukku
Safnast saman við krakkahornið í Flóa
Komdu og hittu þessa hressu og uppátækjasömu stelpu og fylgdu henni í spennandi ratleik um Hörpu. Eva Rún Þorgeirsdóttir er með glænýja bók um Lukku og hugmyndavélina sem nefnist, Lukka og hugmyndavélin í svakalegum sjávarháska.
Bókaverðlaun fyrir fundvísa þátttakendur.

15:00 – 15:30
Jólakortagerð með Lukku

Eva Rún Þorgeirsdóttir höfundur bókarinnar Lukka og hugmyndavélin í svakalegum sjávarháska, kennir krökkum að gera skemmtileg jólakort í anda Lukku.

16:00 – 16:30
Tilfinningasmiðja

Smiðja um tilfinningar þar sem þær Ásta María Hjaltadóttir og Þorgerður Ragnarsdóttir hjálpa okkur að fást við erfiðar tilfinningar okkar með Tilfinningabókunum.

 

Undraland bókanna í Flóa

11:00 – 17:00
Bókasmakk fyrir krakka á öllum aldri

Allar nýjar barna- og ungmennabækur ársins á einum stað til að fletta og skoða.

14:00 – 15:00
Lestrarstund fyrir börn og barnalegt fólk

Barnabókahöfundarnir Bergrún Íris Sævarsdóttir, Hjalti Halldórsson, Ingibjörg Valsdóttir og Jenný Kolsöe lesa úr nýútkomnum bókum sínum.

 

SUNNUDAGUR 19. NÓVEMBER

 

RÍMA A

13:00 – 13:30
Hvað er og hvað ef...
Bergur Ebbi Benediktsson spjallar um bók sína Stofuhita og ástandið á Íslandi og Valur Gunnarsson segir frá bók sinni Örninn og Fálkinn og „hvað ef“ sagnfræði.

13:30 – 14:30
Smásögur heimsins

Spjall um smásögur. Tveir af ritstjórum Smásagna heimsins - Rómanska Ameríka, Rúnar Helgi Vignisson og Jón Karl Helgason og Áslaug Agnarsdóttir, þýðandi bókarinnar Sögur frá Rússlandi ræða um þýðingar og smásögur.  Jón Thoroddsen leiðir spjallið. 

14:30 – 16:00
Ljóðastund

Tíu ljóðskáld flytja ljóð úr nýjum bókum sínum.

  • Bragi Ólafsson: Öfugsnáði
  • Dóri DNA: Órar, martraðir og hlutir sem ég hugsa um þegar ég er að keyra
  • Kött grá pje: Hin svarta útsending
  • Fríða Ísberg, Slitförin
  • Bergþóra Snæbjörnsdóttir: Flórída
  • Heiðrún Ólafsdóttir: Ég lagði mig aftur
  • Gyrðir Elíasson les ljóðaþýðingar: Birtan yfir ánni og Sorgin í fyrstu persónu
  • Aðalsteinn Ásberg Sigurðsson les þýðingar sínar á ljóðum Christine De Luca: Heimferðir
  • Halldóra Thoroddsen: Orðsendingar
  • Sigríður Helga Sverrisdóttir: Haustið í greinum trjánna

16:00 – 17:00
Ljóðastund

Fimm ljóðskáld flytja ljóð úr nýjum bókum sínum.

  • Bubbi: Hreistur
  • Soffía Bjarnadóttir: Ég er hér
  • Hallgrímur Helgason: Fiskur af himni
  • Kristín Ómarsdóttir: Kóngulær í sýningargluggum
  • Dagur Hjartarson: Heilaskurðaðgerðin

 

Ríma B

13:30 – 14:00
Úr heimi fræðanna
Ásdís Jóelsdóttir kynnir bók sína Íslenska lopapeysan – Uppruni, saga og hönnun.

14:15 – 14:30
Tómas Guðmundsson og Svavar Knútur
Tónlistarmaðurinn Svavar Knútur leikur lög við ljóð Tómasar Guðmundssonar í tilefni heildarútgáfu á ljóðum Tómasar.

15:00 – 16:00
Höfundaspjall
Jórunn Sigurðardóttir útvarpskona ræðir við höfundana Kristínu Steinsdóttur, Þórarin Leifsson og Yrsu Þöll Gylfadóttur um nýútkomnar bækur þeirra Ekki vera sár, Kaldakol og Móðurlífið, blönduð tækni.

16:00 – 16:30
Auður djúpúðga

Vilborg Davíðsdóttir ræðir þríleik sinn um landnámskonuna Auði Ketilsdóttur, en síðasta bókin, Blóðug jörð, kemur út í ár.

 

Krakkahorn Sleipnis í Flóa

12:30 – 13:00
Leðurblökusmiðja með Kristínu Rögnu

Kristín Ragna Gunnarsdóttir, höfundur bókarinnar Úlfur og Edda: Drekaauga, stýrir leðurblökusmiðju fyrir krakka sem þora.

13:00 – 13:30
Ofurhetjusmiðja

Bergrún Íris Sævarsdóttir, höfundur bókarinnar Elstur í bekknum, spjallar um myndskreytingar og teiknar með kátum krökkum.

14:00 – 14:30
Klippimyndasmiðja

Klippimyndasmiðja með Ragnheiði Gestsdóttur, höfundi bókarinnar Ég hlakka til.

14:30
Ratleikur með Lukku
Safnast saman við krakkahornið í Flóa
Komdu og hittu þessa hressu og uppátækjasömu stelpu og fylgdu henni í spennandi ratleik um Hörpu. Eva Rún Þorgeirsdóttir er með glænýja bók um Lukku og hugmyndavélina sem nefnist, Lukka og hugmyndavélin í svakalegum sjávarháska.
Bókaverðlaun fyrir fundvísa þátttakendur.

15:00 – 15:30
Settu saman mannslíkamann

Smiðja fyrir fræðimenn framtíðarinnar.

16:00 – 16:30
Flórgoðasmiðja með Angústúru

Fuglar eftir þau Hjörleif Hjartarson og Rán Flygenring er full af undrum úr fuglalífinu. Flórgoðinn er einn af fuglum íslenskrar náttúru.

 

Undraland bókanna í Flóa

11:00 – 17:00
Bókasmakk fyrir krakka á öllum aldri

Allar nýjar barna- og ungmennabækur ársins á einum stað til að fletta og skoða.

14:00 – 15:00
Lestrarstund fyrir börn og barnalegt fólk 

Sigríður Lára Sigurjónsdóttir les úr bókinni Píla Pína eftir Kristján frá Djúpalæk sem nú er loksins fáanleg aftur.
Guðni Líndal les úr bók sinni Stelpan sem ákvað að flytja húsið sitt upp á fjall.

15:00 – 16:00
Lestrarstund fyrir börn og barnalegt fólk

Áslaug Jónsdóttir, Birgitta Haukdal, Gunnar Helgason og Ævar Þór Benediktsson lesa úr nýútkomnum bókum sínum.