Þín eigin hrollvekja

Þín eigin hrollvekja eftir Ævar Þór Benediktsson
Útgefandi: 
Staður: 
Reykjavík
Ár: 
2016
Flokkur: 

Evana Kisa myndlýsti. Bókin er prentuð með letrinu Dyslexie sem auðveldar lesblindum að lesa.

um bókina

Þín eigin hrollvekja er öðruvísi en aðrar bækur því hér ert þú söguhetjan og ræður ferðinni. Sögusviðið er dimmt og drungalegt kvöld, stútfullt af skrímslum og óvættum. Þú getur rekist á vampírur og varúlfa, uppvakninga og illa anda, brjálaðar brúður og tryllta trúða - allt eftir því hvað þú velur.

úr bókinni

Það er ekki séns að þú ætlir að eyða einni einustu sekúndu lengur en þú þarft inni í þessu húsi.

Þú orgar eins hátt og þú getur og hleypur af stað.

Út úr stofunni.

Stefnir í átt að forstofunni.

Allt í einu heyrirðu svakaleg læti.

Þungir dynkir nálgast óðfluga. Þú stoppar.

"Halló?" segirðu lágt og hlustar. Annar þungur dynkur fylgir í kjölfarið. "Hver er þetta?" hróparðu. "Ef þetta er eitthvert grín þá er þetta ekki fyndið!"

Skyndilega gægist eitthvað stórt og mikið fram á gang innan úr eldhúsinu og starir á þig. Út af rafmagnsleysinu áttu erfitt með að sjá almennilega hvað þetta er, þannig að það tekur þig smástund að fatta hver er að kíkja á þig.

"Ert þetta ..." segirðu og grettir þig ósjálfrátt því þér finnst þetta svo fáránleg setning, "þú, ísskápur?"

Ísskápurinn sem pabbi þinn keypti einu sinni í IKEA svara þér með því að trampa aftur af stað, á fullri ferð. Þú orgar enn hærra og byrjar aftur að hlaupa. Ísskápurinn fylgir á eftir.

Hann fer hættulega hratt yfir, jafnvel þótt það sé nýbúið að kaupa í matinn, og er kominn hættulega nálægt. Þú stefnir í áttina að útidyrahurðinni. Ef þú kemst út hlýtur allt að verða í lagi.

Nema þú kemst ekki út.

Þegar ísskápurinn sér að þú ert alveg að fara að sleppa, lætur hann sig falla fram fyrir sig. Þú hljópst ekki nógu hratt.

Hann kremur þig.

ENDIR.

(s. 129-130)