Um bókina
Ljóðabókin til minnis: á uppruna sinn í eins konar ljóðadagbók og geymir því hversdagslegar augnabliksmyndir úr náttúru og borg, litaðar af mismunandi árstíðum, veðri og vindum. Bókin skiptist í tvo kafla, útfiri og næði, og tengjast ljóðin í þeim fyrri náttúru og landi en í þeim síðari er farið um borgina. Ljósmyndirnar í bókinni eru af sama meiði og ljóðin.
Áslaug Jónsdóttir hefur hlotið fjölda viðurkenninga fyrir verk sín og bækur hennar hafa verið þýddar á mörg tungumál, þar á meðal hafa bækurnar úr bókaflokknum um litla skrímslið og stóra skrímslið ferðast víða. Til minnis: er fyrsta ljóðabók hennar.
Úr bókinni
hafsýn
í nepjunni
rennur táramóða
suðvestur
fyrir hornauga
og sjónauka
en skipakomur
eru nú fátíðar
í firðinum
hvítfreyðandi boðaföll
á blindskerjum
kollsteypa hverri von
öldur rymja
með storminn í hálsinum
bryðja urð og grjót
uns lægir
